Uviéu refuercia la so rede europea na conferencia Culture Next en Polonia

Uviéu ta presente na 15ª edición de la conferencia europea Culture Next, que se celebra del 15 al 17 d’ochobre en Bielsko-Biała (Polonia), baxo l’eslógan «Culture, Art and Wellbeing – Best Practice in People’s Engagement». Nesta cita xúntense cultura, bientar y salú mental nes ciudaes que tán comprometíes col cambéu social al traviés del arte.
Antonia Blau, asesora europea pa la candidatura d’Uviéu 2031, participa activamente nesta conferencia. En Polonia mantuvo alcuentros con representantes de Las Palmas de Gran Canaria y Jerez de la Frontera, que tamién tán nel procesu pa la capitalidá cultural europea en 2031. Esti intercambéu d’esperiencies reflexa l’espíritu de collaboración que carauteriza a la rede Culture Next.
El programa de la conferencia inclúi ponencies, talleres y esperiencies inmersives qu’esploren cómo la cultura pue incidir de manera direuta na salú mental: dende proyeutos artísticos que funcionen como ferramienta terapéutica hasta estratexes de participación ciudadana que combaten la soledá y refuercen les comunidaes.
Esti enfoque resuena tamién n’España. Hai poco, los ministerios de Sanidá y Cultura d’España roblaron un alcuerdu pa integrar les artes nes polítiques de salú mental. Entre les sos midíes destaquen la prescripción cultural dende atención primaria, el reconocimientu d’espacios culturales como recursos terapéuticos y la formación conxunta de profesionales de salú y cultura.
Pero nun son too debates y meses redondes. Los participantes na conferencia tuvieron tamién ocasión de saborear la cocina tradicional de Bielsko-Biała, con platos emblemáticos como’l goulash y les tortites de pataca. Esti toque gastronómicu acompaña les conversaciones con momentos de convivencia, xuniendo cultura y bientar al traviés d’un llinguaxe universal: la gastronomía.

¿Por qué Culture Next ye importante pa Uviéu?
La rede Culture Next xunta ciudaes europees que foron, son o aspiren a ser Capital Europea de la Cultura. La so misión ye impulsar la collaboración ente ciudaes, compartir bones práutiques, anovar na xestión cultural y reforzar el papel de la cultura como motor del desenvolvimientu urbanu.
Pa Uviéu, participar nesti foru nun significa namás amosar la so candidatura, sinón formar parte activa d’una rede internacional que da visibilidá, xenera aliances con otres ciudaes europees y favorez l’aprendizaxe compartíu.
La nuesa presencia en Bielsko-Biała reafirma’l compromisu d’Uviéu con una cultura vencida cola salú, el bientar y, de xuru, cola so dimensión europea.