Uviéu honra a Lisardo Lombardía col Premiu Internacional de Folclor «Martínez Torner»

El conceyu d’Uviéu, al traviés de la Escuela Municipal de Música Tradicional Asturiana, concedió esti añu’l Premiu Internacional de Folclor «Martínez Torner» al xestor cultural y exdireutor del Festival Intercélticu de Lorient, Lisardo Lombardía, en reconocencia a la so trayeutoria nel campu de la música tradicional y la investigación etnográfica.

Nacíu en La Pola Llaviana, Lombardía tuvo un papel fundamental na promoción de la cultura asturiana y na so conexón col mundu célticu. Foi creador y direutor d’actividaes como les Nueches Celtes, el Festival del Arpa Celta o l’Uviéu Folk, y el so llabor al frente del Festival Intercélticu de Lorient, ún de los actos culturales más importantes d’Europa, reforzó la visibilidá de les cultures minoritaries y los venceyos culturales ente Asturies y el restu del continente.

Lombardía forma parte del Conseyu Asesor de la candidatura d’Uviéu a Capital Europea de la Cultura 2031, dende onde sigue collaborando na proyeición internacional de la identidá asturiana y na defensa de la diversidá cultural d’Europa.

El xuráu, presidíu pol conceyal de Gobiernu d’Educación y Seguridá Ciudadana, José Ramón Prado, anunció que la gala d’entrega del premiu va celebrase’l 26 de payares n’Uviéu.

Con esti reconocimientu, Uviéu 2031 celebra’l valor de la tradición como motor de creación contemporánea y como ponte ente les cultures europees.