Conversaciones de tres espertes europees sobre’l proyeutu d’Uviéu pa ser Capital Europea de la Cultura

El proyeutu d’Uviéu pa convertise en Capital Europea de la Cultura entra nun momentu clave. Col dosier cuasi zarráu y la mirada puesta en febreru, cuando va tener llugar la defensa ante’l xuráu européu, la candidatura encara la parte final de la so primer fase. Un momentu decisivu que convida a preguntase qué significa de verdá aspirar a esti títulu y pa qué val.

Esa reflexón centró l’alcuentru celebráu nel Club de La Nueva España, nel que participaron tres espertes internacionales: Cristina Farinha, evaluadora del programa Capital Europea de la Cultura; Paula Mota, exdireutora d’Évora 2028; y Antonia Blau, direutora del Institutu Goethe en Madrid. Moderáu pol periodista Chus Neira, la conversación coincidió nuna idea clara: la capitalidá nun ye un premiu nin un escaparate, sinón un procesu de tresformación fonda de la ciudá.

Cristina Farinha repasó la evolución d’un programa que cumple cuarenta años y que güei esixe muncho más qu’una programación cultural bona. La capitalidá implica una estratexa sólida, participativa y con impautu a llargu plazu, na que la cultura actúa como motor de cambéu urbanu, social y económicu. Ciudaes como Lisboa, Oporto o Guimarães marcaron esti xiru, incorporando la rexeneración urbana, la profesionalización del sector cultural y la implicación activa de la ciudadanía.

Antonia Blau destacó’l valor européu del programa, que pon a les ciudaes y a la xente nel centru del proyeutu común. La so esperiencia en Marsella 2013 amuesa cómo la capitalidá puede sirvir pa redefinir la imaxe d’una ciudá, reforzar la so autoestima y reposicionala nel mapa cultural européu.

Pela so parte, Paula Mota sorrayó’l calter coleutivu d’estos procesos, que requieren valentía pa mirase con honestidá y convertir les debilidaes n’oportunidaes. Nel casu d’Évora, el proyeutu nació d’una escucha fonda del territoriu y de la so xente, y articulóse alredor d’un conceutu cultural compartíu.

L’alcuentru dexó un mensaxe especialmente importante pa Uviéu nesti momentu del camín: más allá del resultáu final, el verdaderu valor de la candidatura ta nel procesu. Un procesu que convida a pensar la ciudá, a implicar a la so xente y a usar la cultura como ferramienta pa construyir futuru. Esi trabayu, gane quien gane, yá ta dexando buelga.