Uviéu llanza la so candidatura a Capital Europea de la Cultura 2031 cola Amabilidá como misión y exa vertebradora del proyeutu

Uviéu dio un pasu decisivu nel so camín a la Capitalidá Europea de la Cultura 2031 cola entrega oficial del bidbook al Ministeriu de Cultura y la presentación pública de la candidatura ante los medios de comunicación.

Esti fitu supón un puntu y siguíu clave nun procesu desendolcáu a lo llargo del últimu añu, que tuvo como exa central la participación ciudadana, la escucha activa y el diálogu permanente col texíu cultural y social d’Uviéu y de toa Asturies.

El dosier de candidatura recueye’l proyeutu cultural col qu’Uviéu aspira a convertise en Capital Europea de la Cultura en 2031. Trátase d’un documentu construyíu tres de meses de trabayu intensu, alcuentros, meses de participación y centenes d’entrevistes que dexaron perfilar una propuesta alliniada coles carauterístiques, los retos y les oportunidaes del territoriu.

Nel actu de presentación, el direutor de la candidatura, Rodolfo Sánchez, esplicó la evolución conceutual del proyeutu, qu’entamó col eslogan ¡Puxa Europa! y qu’acabó nel conceutu que va guiar tola candidatura: l’Amabilidá.

Esta amabilidá plantéase como una ferramienta de tresformación cultural y social, que ye quien a conciliar xeneraciones, reequilibrar les faltes, combatir la soledá non deseada, frontiar los desequilibrios demográficos y ufiertar una respuesta democrática frente a la polarización, l’aisllamientu y l’aumentu de los discursos d’odiu n’Europa.

Esti conceutu xurde d’un procesu de reflexón compartida nel que fueron clave les aportaciones esternes. El científicu Carlos López-Otín introduxo la idea del esposoma amable, entendíu como’l conxuntu de factores sociales, culturales y ambientales que favorecen el bientar físicu y mental, y que n’Asturies atopa un entornu especialmente afayadizu.

L’amabilidá materialízase tamién n’espacios simbólicos como l’antigua Fábrica d’Armes de La Vega, onde la pallabra yá taba presente como eslogan y que güei se resignifica como una declaración d’intenciones. Tresformar un llugar venceyáu a la producción d’armes nun espaciu pa la convivencia cultural y la investigación ye una de les grandes herencies qu’aspira a dexar la candidatura.

A partir d’esta exa conceutual diseñóse tol conteníu del proyeutu, incluyíu’l programa artísticu presentáu por Natalia Álvarez Simó, que sorrayó la capacidá de la cultura pa tresformar la sociedá y avanzar escontra nueves formes de rellación coles persones y col entornu.

Esta programación articúlase alredor de tres conceutos fondamente arraigaos na cultura asturiana: Abellugu, entendíu como refuxu y espaciu d’hospitalidá; Orbayu, como símbolu del tiempu fértil que permite los alcuentros y les mestures; y Sestaferia, como espresión del trabayu comunitariu y de l’ayuda mutua.

Tamién intervieno’l direutor xeneral d’Aición Cultural y Normalización Artística, Antón García, que reflexonó sobre la importancia de la collaboración ente les alministraciones y los conceyos asturianos. Zarró l’actu l’alcalde d’Uviéu, Alfredo Canteli, que resaltó’l trabayu de les persones que formen l’equipu.

Tres la entrega del bidbook, el próximu gran fitu del procesu va ser la defensa del proyeutu ante un comité de 12 espertos europeos, prevista pa febreru de 2026. Va ser una fase decisiva na qu’Uviéu va esponer, a lo llargo d’una hora y media, la so visión cultural pa Europa, cola mira puesta na decisión final de la Capital Europea de la Cultura a finales de 2026.