La lleenda del rock español Miguel Ríos llega a Xixón cola so xira El último vals, un percorríu por dellos de los teatros más emblemáticos del país que empezó n’ochobre de 2025 y que va estendese hasta mayu de 2026.

El conciertu va permitir conocer en direutu’l so nuevu trabayu discográficu. Sobre l’escenariu, Miguel Ríos va tar acompañáu por cuatro músicos multinstrumentistes, nun formatu electroacústicu onde s’alcuentren soníos del rock y del country. L’álbum, compuestu xunto col productor José Nortes, grabóse íntegramente en Black Betty Studios.

Con más de 65 años enriba de los escenarios, Miguel Ríos sigue demostrando una enerxía incombustible y una conexón especial col públicu. Esta nueva xira pon en valor el legáu d’una de les figures fundamentales del rock n’español, nuna cita que combina memoria musical y nueves composiciones.