Paula Mota y Zoe López, nueves codirectores artístiques d’Uviéu 2031, comparten escenariu per primer vegada nel entamu del festival “Sin Límites”

El Conseyu de la Mocedá d’Oviedo acoyó’l Festival Sin Límites, una cita que celebra la diversidá, la inclusión y la participación de la mocedá na cultura, y que sirvió como escenariu pa la primer intervención conxunta de les nueves codirectores artístiques de la candidatura a Capital Europea de la Cultura 2031, Paula Mota y Zoe López.

Dambes dieron a conocer esta nueva etapa del proyectu, que incorpora una codirección artística encargada de definir y liderar el programa cultural nesta fase de la candidatura. Na so intervención, avanzaron les llinies de trabayu en marcha, con especial atención a la accesibilidá, la participación xuvenil y una cultura más abierta ya inclusiva.

“Estamos trabayando nun proyectu del que formáis parte, na llinia de la accesibilidá de la cultura y de la mocedá que tamién participa nella”, señaló Zoe López, quien destacó amás la importancia de que l’alumnáu salga de los centros educativos pa vivir la cultura en primer persona, en propuestes como esti festival, onde la diversidá ye l’exe central.

Nesti contestu, tamién se convidó a la ciudadanía a conocer más sobre’l proyectu en Kuivi Almacenes, onde a les 20:00 hores va celebrase una charra acompañada d’un conciertu pa esplicar l’estáu actual de la candidatura y resolver duldes. Nel actu reiteróse que tanto Oviedo como Asturias tienen too lo necesario pa aspirar al títulu européu, destacando la importancia de reforzar l’autoestima cultural del territoriu y fomentar la participación ciudadana.

Pela so parte, Paula Mota recordó que’l procesu atópase nun momentu decisivu dientro d’una competición europea, cuyo resultáu se conocerá a finales d’añu, destacando que hasta entós ábrese una etapa de trabayu intensu na que se va siguir recoyendo la opinión de la ciudadanía y xenerando espacios de diálogu.

Tres esta intervención, el Festival Sin Límites dio entamu con una programación que s’estiende a lo llargo de tol día y que convierte la ciudá nun puntu d’alcuentru pa propuestes artístiques diverses. La mañana entamó cola actuación del grupu de teatru La Orquesta, siguida del Colectivu Diversu y les sesiones musicales de Trezze y Sergio DJ. Pela tarde, ta prevista la proyección de la película Sorda, completando una xornada que reivindica una cultura ensin barreres y pa toles persones.