ArteOviedo celebra la so 15ª edición en Trascorrales con nueves propuestes y una apueste firme pol coleicionismu
La sala Trascorrales acueye dende’l 12 de payares la XV Feria ArteOviedo, una cita yá consolidada nel calandariu cultural ovetense que xunta obra de 14 galeríes y que se pue visitar hasta’l 16 de payares. El conceyal de Cultura y presidente de la Fundación Municipal de Cultura, David Álvarez, inauguró oficialmente esta edición que vuelve a asitiar l’arte contemporaneu nel centru de la vida cultural de la ciudá.
El percorríu d’esti añu reflexa la diversidá creativa del ecosistema artísticu asturianu: los demonios espresivos de Pablo Iglesias Prada conviven a pocos pasos de los personaxes de Juan Díaz-Faes; la Asturies capturada pola cámara de Ricardo Villoria dialoga cola reinterpretación de Galano; y l’imaxinariu de Luzía Pedregal conecta, d’estremu a estremu, colos portales simbólicos d’Alba Matilla. Un mapa visual que confirma la vitalidá del sector y la so capacidá pa xenerar nuevos relatos dende Uviéu.
La directora de la feria, Natalia Alonso, destacó l’ampliación del programa y la incorporación de nuevos talleres y actividaes formatives: un espaciu de llectura en torno a Balthus, propuestes teatrales y sesiones inspiraes en creadores como Sophie Taeuber-Arp o Leonora Carrington. A esta ufierta súmase una novedá especialmente relevante pal ecosistema artísticu local: un serviciu d’asesoría de coleicionismu que busca fortalecer la rellación ente públicu, artistes y galeríes.
Al frente d’esti serviciu ta Natalia García, que va ufiertar orientación personalizada. García destacó la importancia d’averar el coleicionismu a nuevos públicos y recordó que en ArteOviedo conviven obres pa tolos presupuestos, dende pieces accesibles hasta otres de mayor valor artísticu.
Na inauguración entrégaronse los reconocimientos anuales. La medaya “En memoria de Kely” foi otorgada a El verdugo de almas, de Pablo Iglesias Prada, presentada por Zooh Micro Gallery y escoyida pola Fundación Municipal de Cultura pa incorporase a los sos fondos. La Beca de Producción de Caja Rural recayó en Iyán Castaño, cuyes obres de testura inspiraes na sable integraránse na coleición del Muséu de Belles Artes d’Asturies, xunto con nueves pieces mercaes pola Asociación d’Amigos del muséu.
La Escuela d’Arte d’Uviéu participa tamién nesta edición y va cuntar con un papel destacáu nes actividaes paraleles, reforzando’l vencellu ente formación, creación y territoriu.
