Asturies acoyerá per primer vegada’l Festival Internacional de la Mazcarada Ibérica (FIMI) nel marcu de la candidatura d’Uviéu a Capital Europea de la Cultura 2031
Asturies va ser esti añu la sede de la decimoctava edición del Festival Internacional de la Mazcarada Ibérica (FIMI), que per primer vegada dende la so creación en 2006 sale de Portugal pa celebrase n’otru territoriu.
La celebración del FIMI n’Asturies coincide col procesu entamáu pola Conseyería de Cultura del Principáu pa declaralo Bien d’Interés Cultural (BIC), de calter inmaterial, al conxuntu de les mazcarades asturianes. Esta ye una oportunidá pa reforzar la visibilidá y el reconocimientu d’estes tradiciones como parte esencial del nuesu patrimoniu cultural.
La edición asturiana ta financiada pola Conseyería de Cultura del Principáu y cuenta cola collaboración del Conceyu d’Uviéu y de la candidatura d’Uviéu a Capital Europea de la Cultura 2031. La participación activa del proyectu de candidatura nesta edición sorraya’l so compromisu cola conexón ente territorios europeos al traviés de la cultura, favoreciendo l’intercambiu ente comunidaes, la creación de redes internacionales y el reconocimientu del patrimoniu inmaterial como parte del relatu cultural común d’Europa.
El programa va espardese por distintos puntos del territoriu, con especial presencia nos conceyos onde la tradición de les mazcarades sigue viva. Incluirá esposiciones, un ciclu de conferencies y meses de debate con especialistas de distintos países europeos, conciertos y actuaciones, talleres y demostraciones d’artesanía y proyecciones de películes y documentales sobre fiestes y mazcarades europees. La programación va culminar el próximu 13 de xunu con un gran desfile n’Uviéu, actu central del festival, nel que van participar alredor de 600 persones pertenecientes a grupos d’España, Portugal y otros países europeos.
Dende la so primer edición n’Oporto y la so posterior consolidación en Lisboa, el FIMI convirtióse nuna plataforma de referencia pal intercambiu cultural ente territorios con tradiciones de mazcarada. Grupos asturianos como los Mazcaritos d’Uviéu, Os Reises de Tormaleo, Os Reises de Valledor o los Sidros participaron activamente en distintes ediciones en Portugal, fortaleciendo una rede cultural tresfronteriza que agora s’amplía cola so celebración n’Asturies.
Con esta edición, Uviéu y el conxuntu del Principáu consolídense como puntu d’alcuentru internacional alredor del patrimoniu cultural inmaterial, reforzando la dimensión europea del territoriu nel marcu de la candidatura a Capital Europea de la Cultura 2031 y asitiando la cultura tradicional como motor de conexón.
