Avilés xunta al sector cultural en nueves mesas participatives sobre música y artes escéniques

La Factoría Cultural d’Avilés acoyó una nueva xornada del procesu participativu impulsáu pola candidatura d’Uviéu a Capital Europea de la Cultura 2031. L’alcuentru xuntó a profesionales del ámbitu de la música y les artes escéniques nun espaciu de reflexón sobre los retos culturales del territoriu.

Na sesión tratáronse temes clave como la cultura de proximidá, el sofitu a la creación contemporánea, la mediación cultural y la educación artística pa les nueves xeneraciones. Tamién se punxo en valor la necesidá de xenerar más propuestes culturales dirixíes a les persones mayores, nel contestu del avieyamientu de la población.

El equipu de la candidatura destacó qu’esti proyeutu nun se basa namás nel patrimoniu existente, sinón na capacidá coleutiva de construyir una cultura anovadora, inclusiva y tresformadora.

Estes mesas formen parte d’un percorríu participativu per delles llocalidaes d’Asturies, onde se recueyen idees y propuestes qu’alimenten una candidatura compartida y representativa de tol territoriu.