Dido Carrero y Semíramis González xúnense al equipu de comisariáu d’Uviéu 2031

L’equipu de la candidatura Uviéu Capital Europea de la Cultura 2031 sigue medrando. Dido Carrero Muñiz y Semíramis González Fernández incorpórense como comisaries de les estayes de Salú y Cultura y Artes Plástiques, respeutivamente, sumándose al grupu que vien trabayando dende agostu nes estremaes llinies clave del proyeutu.

Cola so llegada, l’equipu de comisariáu algama les diez persones, con perfiles diversos pero complementarios. El so llabor va ser fundamental p’arriquecer la propuesta qu’Asturies presentará n’avientu de 2025, articulando un proyeutu cultural sólidu, ambiciosu y fondamente coneutáu col territoriu. Cada comisaria y comisariu trabaya direutamente con artistes, creadores y axentes del texíu cultural asturianu pa impulsar proyeutos que contribuyan a dar forma a la programación de la candidatura.

Dido Carrero Muñiz (Uviéu, 1994) ye bióloga molecular, historiadora del arte ya investigadora. Formóse na Universidá d’Uviéu y entamó la so carrera científica nel llaboratoriu de Carlos López Otín, participando na descripción d’una nueva enfermedá rara del grupu de los síndromes proxeroides. Amplió la so formación en Harvard University y King’s College London, y posteriormente consiguió una Beca FPU pa facer el so doctoráu en biomedicina y oncoloxía molecular. La so investigación sobre la Turritopsis dohrnii, conocida como la «medusa inmortal», tuvo gran repercusión internacional. Al mesmu tiempu, cursó Historia del Arte na UNED y fundó’l proyeutu curatorial CERÚLEO, qu’explora’l cruce ente arte y ciencia. Anguaño trabaya nel Centru Nacional d’Investigaciones Oncolóxiques (CNIO) de Madrid y collabora como comisaria independiente.

Semíramis González Fernández (Xixón, 1988) ye xestora cultural, historiadora del arte y comisaria especializada n’arte contemporaneu con perspeutiva feminista. Llicenciada n’Historia del Arte pola Universidá d’Uviéu y con un máster n’Historia del Arte Contemporaneu y Cultura Visual pola Universidá Complutense de Madrid y el Muséu Nacional Centru d’Arte Reina Sofía, desenvolvió’l so llabor n’instituciones como Es Baluard Museu d’Art Contemporani de Palma, PHotoEspaña, SCAN Tarragona, el Centru Atlánticu d’Arte Modernu y l’IAACC Pablo Serrano. Ente 2018 y 2022 foi direutora artística de les feries JUSTMAD y JUSTLX. Dende 2022 comisaría’l programa «Visión y Presencia» nel Muséu Nacional Thyssen-Bornemisza, y dende xunetu de 2025 dirixe LABoral Centru d’Arte y Creación Industrial.

Con estes incorporaciones, l’equipu de comisariáu d’Uviéu 2031 consolídase como un grupu plural y de primer nivel, con perfiles complementarios que trabayen de manera coordinada pa construyir la programación que representará a Asturies énte Europa. La candidatura refuerza asina’l so compromisu con un proyeutu participativu y d’alcuerdu rexonal, que pon la cultura nel centru de la tresformación del territoriu.