El coloquiu “Europa énte’l retiu de la cultura” destaca’l consensu políticu que sofita la candidatura Uviéu 2031
El Club LA NUEVA ESPAÑA acoyó ayeri’l coloquiu “Europa énte’l retiu de la cultura”, una conversación ente los eurodiputaos asturianos Jonás Fernández (PSOE) y Susana Solís (PP), moderada pol periodista Chus Neira. La charla centróse nel papel de la cultura nel proyeutu europeu y nel valor determinante del consensu políticu pa fortalecer la candidatura de Uviéu a Capital Europea de la Cultura 2031.
Fernández destacó que l’alcuerdu institucional alredor de Uviéu 2031 ye “ensin precedentes na historia reciente d’Asturies”, ente que Solís insistió en que’l consensu ye “la meyor alternativa al conflictu” y un elementu clave pa valorar la fortaleza del proyeutu. Dambos coincidieron nel potencial económicu, social y tresformador d’una candidatura transversal que reforza l’acervu europeu y la defensa de los valores democráticos.
Anque asistíen como públicu, dellos representantes políticos asturianos intervinieron de manera espontánea, amosando’l sofitu plural que xenera’l proyeutu. Gaspar Llamazares (IU) reflexonó sobre’l retu d’integrar la cultura analóxica y dixital y sobre la importancia d’una mirada abierta y non localista. Pela so parte, Javier Vallina (PSOE) destacó la capacidá de la cultura pa xenerar conexones y afondar na reflexión sobre lo que significa ser asturianu nun contestu global. La conceyala d’Economía, Leticia Álvarez, punxo en valor l’esfuerciu que se ta faciendo dende’l Conceyu y l’impactu positiu que la capitalidá tendrá en tol país. Nacho Cuesta, segundu teniente d’alcalde, recordó que la participación, la sostenibilidá, la innovación y la cohesión son pilares fundamentales del proyeutu.
El coloquiu amosó que Uviéu 2031 avanza con una base institucional sólida y un sofitu políticu ampliu, dos elementos esenciales pa encarar les siguientes fases de la candidatura y siguir construyendo dende Asturies una visión cultural europea compartida.
