El festival LINK 2025 arranca la so sesta edición na Fábrica d’Armes de La Vega.

El festival LINK 2025 inauguróse güei, vienres 29 d’agostu, a les 11:30 hores na Fábrica d’Armes de La Vega, nun actu que cuntó cola presencia de la corporación municipal encabezada pol alcalde d’Uviéu, Alfredo Canteli, representantes del Ministeriu de Defensa y l’equipu de la candidatura d’Uviéu a Capital Europea de la Cultura 2031.

Na so sesta edición, LINK convierte otra vuelta a Uviéu nun llaboratoriu creativu onde l’arte, la teunoloxía y la ciudadanía dialoguen ensin fronteres. A lo llargo del fin de selmana, el públicu va poder disfrutar de cuatro esperiencies de realidaes estendíes —con propuestes de realidá virtual, aumentada y cine 360º— y de dos instalaciones audiovisuales inmersives, amás de talleres y actividaes participatives.

Horarios pa visitar la Fábrica de La Vega:

Vienres 29 d’agostu: 16:30 – 22:30 h

Sábadu 30 d’agostu: 11:00 – 14:00 h y 16:30 – 22:30 h

Domingu 31 d’agostu: 11:00 – 14:00 h y 16:30 – 22:30 h

Toles actividaes son de baldre, con aforos llindaos y accesu per orde d’arribada. Les esperiencies de realidaes estendíes precisen inscripción gratuita na propia Fábrica d’Armes el mesmu día de l’actividá.

Con esta edición, LINK reafirma la so aposta pola sostenibilidá, la innovación y la participación ciudadana, consolidándose como ún de los festivales culturales más singulares de la ciudá.