“Europa na mio Rexón” celebra la creatividá asturiana col certame ARTurias nel IES La Florida

La creatividá asturiana foi ayeri la gran protagonista n’ARTurias, un certame multidisciplinar que xuntó a artistes de toles edaes y disciplines nuna gala celebrada nel IES La Florida.

L’actu formó parte de la campaña Europa na mio Rexón 2025, entamada pola Xunión Europea y el Gobiernu del Principáu d’Asturies, que per primer vegada se celebra n’Asturies.

El certame premió tres obres ganadores ente venti finalistes, escoyíes pola so orixinalidá, téunica y capacidá pa tresmitir una visión personal y contemporánea d’Asturies. L’oxetivu: usar l’arte como llinguaxe común pa coneutar cultures, xeneraciones y territorios.

«Queríemos convidar a la ciudadanía a amosar cómo ve Asturies al traviés de los sos güeyos. Y lo que recibimos ye un auténticu retratu coleutivu, llenu d’emoción, diversidá y talentu. Un retratu coleutivu de l’asturianía contemporánea», dixo Inmaculada Cereceda, direutora del IES La Florida.

Pintura, fotografía, illustración o collage: n’ARTurias nun hai edá nin llendes creatives. Participantes d’ente 15 y 99 años compartieron la so mirada sobre lo que significa güei ser y sentir Asturies.

Esti espíritu participativu conéutase direutamente cola candidatura d’Uviéu Capital Europea de la Cultura 2031, que pon la cultura y la creatividá nel centru de la tresformación social y territorial.

La gala cuntó cola presencia de representantes institucionales y collaboradores destacaos, como:

Vicente Rodríguez Sáez (DG REGIO)

Alberto Gutiérrez (Ministeriu de Facienda d’España)

Raquel García (Direición Xeneral d’Asuntos Europeos)

Europa y Asturies

ARTurias forma parte d’una campaña más amplia que pon en valor cinco grandes proyeutos financiaos con fondos europeos n’Asturies:

Ampliación del IES La Florida (Uviéu)

Tresformación de la Escuela Superior d’Arte d’Avilés

Creación del primer institutu de secundaria sostenible n’España (IES La Fresneda)

Meyora del MUXA (Museu Xurásicu d’Asturies)

Revitalización del Centru Avilés Anova

Estes iniciatives fortalecen la educación, caltienen el patrimoniu cultural y abren oportunidaes de futuru, reforzando la collaboración ente la Xunión Europea y Asturies pa construyir una rexón más sostenible, creativa y coneutada.