La violinista Ana María Valderrama y el pianista David Kadouch xunen el so arte alredor del universu del poeta Federico García Lorca. El dúu vien de publicar un discu (IBS Classical, 2024) que recueye obres estrechamente venceyaes al poeta granadín y que foi reconocíu como meyor álbum de música clásica de 2024 pola Academia de la Música Española.

Esta actuación, enmarcada dientro del CIMCO, xunta pieces de dellos compositores inspiraes nos versos de Lorca, amás d’una escoyeta de canciones que’l propiu poeta armonizó y que s’ufrirán equí en nuevos arreglos pa violín y piano realizaos por Alberto Martín. Nel programa inclúyense tamién la Sonata pa violín y piano de Poulenc, una escoyeta de Tres retratos d’Alicia Terzian, la Sonata pa violín de Debussy y l’arreglu de Fritz Kreisler sobre la “Danza española” de La vida breve, de Manuel de Falla.

Too ello va tar acompañáu pola poesía de Lorca, recitada pola propia Ana María Valderrama.