Del 5 al 7 de setiembre, de 12:00 a 22:00, el Recintu Ferial Luís Adaro de Xixón acoyerá otra vuelta la CometCon, l’encontru de cultura y ociu alternativu más grande d’Asturies y ún de los más destacaos del norte d’España. Dende 2013, esti eventu xunta a miles d’aficionaos a la ciencia ficción, el cómic, la lliteratura, la música, el cosplay, los videoxuegos, los xuegos de mesa, el rol, el cine y el coleicionismu.

La edición de 2025 inclúi una gran zona de videoxuegos con la última teunoloxía, esperiencies de realidá virtual y torneos, amás de concursos tan populares como’l Dance Arena, el CometCon Talent y el Cosplay Stage. Tamién habrá una Zona Maker con talleres STEAM, drones e impresión 3D, xunto con charres, actividaes pa toles edaes y la presencia d’invitaos especiales.

Patrocinada por Xixón Impulsa, la cita contará amás con talleres propios centraos na creatividá y la teunoloxía. Les entraes yá tán disponibles online.