Llanera celebra les bodes de plata de la so Fiesta de los Exconxuraos, una cita declarada d’Interés Turísticu del Principáu que xune historia, tradición y música, y que s’anicia como ún de los eventos imprescindibles del branu asturianu.

Del 4 al 6 de xunetu, el recintu ferial d’Ables convertirase nuna villa medieval, con mercáu artesanu, desfiles, espectáculos y la tradicional recreación histórica del perdón episcopal que da orixe a esta fiesta, basada nun fechu real del sieglu XV.

Na programación d’esti añu destaca una pregonera especial, amás de concerts y actuaciones pa tolos públicos. El vienres 4 actúen Mägo de Oz y l’orquesta La Fórmula. El sábadu 5, el grupu The Goat (con Dani Parrondo) y l’orquesta gallega París de Noia. Y el domingu 6, espectáculu familiar con Pinturilla y la familia Vainilla y monólogu del humorista televisivu Wilbur.

La tradicional cena medieval con tornéu, les representaciones teatrales, la música en direuto y l’ambientación convierten esti fin de selmana nun referente cultural y festivu del conceyu y d’Asturies.