Formada en Sevilla en 2015, Vera Fauna ta a piques de cumplir diez años de camín con una identidá musical cada vegada más definida.

En 2020 publicaron el so primer discu, Dudas y flores, onde entemecíen folclor y neopsicodelia con naturalidá. Dos años más tarde llegó Los años meyores (2022), consolidando un soníu propiu y reconocible.

Formada por Kike Suárez, Javi Blanco, Juanlu Romero, Jaime Sobrino y Alejandro Fernández, la banda sigue explorando y afinando’l so universu creativu. El so próximu trabayu, Dime dónde estamos (2025), abre nueves víes con influyencies del rap, R&B y rock clásicu, y cuenta con collaboraciones d’Ángeles Toledano y Noni Meyers.

Ensin perder la so esencia sureña, Vera Fauna practica un costumbrismu contemporaneu: canciones que falen de lo cotidianu con humor, cercanía y esi aire luminosu que fai que quieras quedar un ratín más.