La candidatura d’Uviéu 2031 protagoniza’l Día d’Uviéu na FIDMA

La Feria Internacional de Muestras d’Asturies (FIDMA) celebró esti sábadu’l Día d’Uviéu, nun actu institucional nel que la candidatura a Capital Europea de la Cultura 2031 foi l’eixe central. L’alcuentru cuntó cola presencia del alcalde Alfredo Canteli, acompañáu de conceyales de la Corporación municipal, autoridades del Principáu, representantes de conceyos asturianos y del texíu empresarial y cultural de la rexón.

L’alcalde Canteli defendió la candidatura como “un gran retu colectivu pa Uviéu y pa tola Asturies”, destacando la importancia del patrimoniu, el talentu artísticu y la unidá institucional algamada: “Necesitamos trabayar xuntos pa demostrar que somos merecedores d’esti títulu y aprovechar la oportunidá de proyeutar la nuesa cultura haza Europa”.

La alcaldesa de Xixón, Carmen Moriyón, soblinié que “lo que pase n’Uviéu interpélanos a tolos asturianos” y que la capitalidá cultural va beneficiar al conxuntu de la rexón. Na mesma llinia, la presidenta de la Federación Asturiana de Conceyos, Cecilia Pérez, recordó que esti proyectu “ye una palanca pa reforzar la collaboración ente conceyos y xenerar nueves dinámique culturales y económiques”.

Otros intervinientes, como’l vicepresidente de la Cámara de Comerciu de Xixón, Pedro López, l’alcalde de Llangréu, Roberto García, la conseyera de Cultura, Vanessa Gutiérrez, y el presidente de la Xunta Xeneral del Principáu, Juan Cofiño, coincidieron en que la candidatura representa una oportunidá única pa impulsar el desarrollu económicu, social y cultural d’Asturies, amás d’afitar venceyos con Europa dende la cultura como motor de cohesión.

L’actu, celebráu nel stand d’Uviéu na FIDMA, reafirmó’l compromisu institucional, social y ciudadanu cola candidatura d’Uviéu a Capital Europea de la Cultura 2031.