La Cofradía d’El Desarme reafirma’l so sofitu a la candidatura d’Uviéu 2031

El puestu d’Uviéu na Feria Internacional de Muestres d’Asturies (FIDMA), dedicáu a la candidatura a Capital Europea de la Cultura 2031, acoyó la presentación de la Fiesta d’El Desarme, que se va celebrar del 17 al 26 d’ochobre. El conceyal de Turismu, Alfredo García Quintana, destacó la importancia de la gastronomía como motor turísticu y cultural, recordando que El Desarme ye “la fiesta gastronómica por escelencia” y que se trabaya pa llograr el so reconocimientu como Fiesta d’Interés Turísticu Nacional.

L’alcalde en funciones, Mario Arias, sorrayó que El Desarme “xune historia, cultura y gastronomía dende 1836” y ye un exemplu de collaboración ente instituciones y ciudadanía. Convidó a esfrutar d’un programa ampliáu con actividaes históriques, culturales y gastronómiques qu’atraigan visitantes a la ciudá.

El Cofrade Mayor, Miguel Ángel de Dios, presentó les principales novedaes, como’l primer Festival de Bandes de Música (18 d’ochobre), el pregón a cargu de Nando Agüeros (17 d’ochobre) y concursos de poesía y fotografía. El menú tradicional va sirvise en 42 establecimientos, acompañáu de los “Bocaos del Desarme” en chigres y restaurantes de la ciudá.

Con esta edición, Uviéu reafirma’l so compromisu cola cultura y la tradición, integrando El Desarme como parte de la so candidatura a la Capital Europea de la Cultura 2031.