La Orquesta Uviéu Filarmonía abre’l ciclu de presentaciones culturales nel puestu d’Uviéu Capital Europea de la Cultura na FIDMA, cola presentación de la so nueva temporada.

La Orquesta Uviéu Filarmonía foi la encargada d’abrir el ciclu de presentaciones culturales del puestu d’Uviéu na Feria Internacional de Muestres d’Asturies (FIDMA), dedicáu esti añu a la candidatura a Capital Europea de la Cultura 2031.

La conceyala de Festexos, Centros Sociales y Mocedá, Covadonga Díaz, presentó l’actu, nel que tamién intervinieron la presidenta de la Fundación Musical Ciudá d’Uviéu, Pilar Rubiera, y el direutor artísticu, Cosme Marina. L’actu acompañóse cola interpretación d’un cuartetu de la orquesta.

Pilar Rubiera recordó que 2025 ye un añu clave pa la candidatura d’Uviéu a la capitalidá cultural y destacó que la ciudá ta trabayando xunto con otros conceyos asturianos “p’amosar a Europa y al mundu que somos un territoriu pequeñu, pero con una gran personalidá paisaxística, histórica, cultural y social”. Sorrayó qu’Uviéu “ta arguyosa de la so historia y de la so tradición cultural y musical, y de la so conexón secular coles grandes capitales europees”.

Cosme Marina destacó la importancia de la música na identidá europea y anunció que la temporada nueva de los Conciertos del Auditorio y les Xornaes de Pianu Luis G. Iberni va tener “una clara vocación europea”. Ente’l 29 d’ochobre de 2025 y el 4 de xunu de 2026, l’Auditoriu Príncipe Felipe acoyerá 18 actuaciones d’artistes como Zubin Mehta, Yuja Wang, William Christie, Jakub Orlinski o Pinchas Zukerman, nuna programación que va abrir y zarrar la Uviéu Filarmonía.