La Vega, un nuevu corazón cultural pal Uviéu del futuru

El conceyu d’Uviéu punxo en marcha’l procesu pa que l’antiguu conxuntu de la Fábrica d’Armes de La Vega dexe de ser un espaciu zarráu y aislláu y pase a integrase plenamente na ciudá. Ye una intervención estratéxica que s’allinia cola visión d’Uviéu como Capital Europea de la Cultura 2031, al poner la cultura como motor de tresformación urbana, social y económica.

La inminente constitución de la comisión de siguimientu prevista nel conveniu firmáu en setiembre de 2024 ente el conceyu, el Gobiernu d’España y el Principáu d’Asturies marca l’entamu formal d’una actuación llargaramente esperada. L’oxetivu ye recuperar La Vega como un espaciu abiertu, con usos culturales, zones verdes, actividá económica y vivienda, coneutáu colos barrios de La Tenderina y Ventanielles y col bulevar de Santuyanu.

Nes próximes selmanes convocaráse un concursu d’idees que definirá’l futuru del recintu, garantizando la protección de la ilesia prerrománica de San Xulián de los Prados, Patrimoniu Mundial, y la conservación de les naves de mayor valor históricu. El derribu de los muros actuales supondrá un xestu simbólicu d’apertura y reconexón cola ciudá.

El proyectu contempla una combinación d’usos que refuercia’l papel de La Vega como nuevu polu cultural. Dalgunas de les iniciatives yá tán recoyíes nel Plan Estratéxicu de la Cultura que acompaña la candidatura d’Uviéu 2031, como la creación d’una escuela de cine, un gran espaciu escénicu, un centru de creación contemporánea y una gran biblioteca central.

La recuperación de La Vega ye una apuesta de ciudá coherente colos valores europeos de participación, sostenibilidá y accesu a la cultura, y refuercia l’ambición d’Uviéu de ponese nel mapa cultural européu col horizonte de 2031.