La VI edición de LINK refuerza la candidatura d’Uviéu 2031 con arte dixital y esperiencies inmersives

El puestu d’Uviéu na Feria Internacional de Muestres d’Asturies (FIDMA), dedicáu esti añu a la candidatura a Capital Europea de la Cultura 2031, acoyó la presentación de la sesta edición de LINK – Circuitu d’Esperiencies Culturales Insólites, que va celebrase na Fábrica d’Armes de La Vega del 29 al 31 d’agostu. El programa foi presentáu pola conceyala de Festexos, Mocedá y Centros Sociales, Covadonga Díaz, y el direutor artísticu del festival, José Castellano. Díaz destacó que LINK “refuerza la ufierta artística de la candidatura d’Uviéu 2031, apostando pola anovación, el diálogu ente disciplines y l’apertura a lo desconocíu”. Castellano definió l’actu como “un espaciu d’alcuentru de llinguaxes artísticos avanzaos y nueves teunoloxíes, con instalaciones d’avanzada y realidaes estendíes que lleguen per primer vegada a Asturies y, en munchos casos, a España”.

El programa inclúi dos instalaciones audiovisuales de gran formatu: LifeForm, del artista canadiense Herman Kolgen, y Hint, del coleutivu SPIME.IM xunto col creador Akasha. Amás, van poder esperimentase cuatro propuestes internacionales de realidá mesta y aumentada: Impulse: Playing With Reality (premiu na Bienal de Venecia), Ito Meikyu (Gran Premiu nel Festival de Venecia), Colored (galardonada en Cannes) y In Pursuit of Repetitive Beats, sobre la cultura rave británica.

Toles actividaes son de baldre, con accesu llibre hasta completar l’aforu y con rexistru na propia Fábrica d’Armes pa les esperiencies inmersives. Los horarios van ser el vienres de 16:30 a 22:30 hores y el sábadu y domingu de 11:00 a 14:00 y de 16:30 a 22:30 hores.

Con esta nueva edición, LINK consolida a Uviéu como escaparate internacional d’arte dixital y propuestes culturales anovadores, sumando valor a la so candidatura como Capital Europea de la Cultura 2031.