L’equipu d’Uviéu 2031 alcuéntrase colos vecinos de Teatinos pa impulsar la cultura dende los barrios

Ayeri, l’equipu de la candidatura d’Uviéu a Capital Europea de la Cultura 2031 treslladóse al centru social de Teatinos p’aconceyar un alcuentru de trabayu col texíu vecinal del barriu.

Teatinos ye un exemplu claru de cómo’l crecimientu urbanu pue dir de mano de servicios públicos, bones conexones y una apuesta firme pol bientar coleutivu. A lo llargo de la xornada, xeneróse un intercambéu d’idees y propuestes pa siguir avanzando escontra una ciudá más participativa ya inclusiva.

Ún de los puntos más destacaos foi la identificación d’un espaciu con potencial grande: la capiella del vieyu hospital psiquiátricu, una de les poques desacralizaes n’España. Les vecines y vecinos propunxeron esti llugar emblemáticu como sede p’acoyer actividaes culturales, reforzando asina ún de los oxetivos principales de la candidatura: descentralizar la ufierta cultural y llevala a tolos requexos de la comunidá autónoma.

Teatinos caltién una memoria obrera fuerte y una identidá comunal bien fonda, lo que da un valor simbólicu y social añadíu a iniciatives que reconozan el pasáu y proyeuten un futuru compartíu. Llevar la cultura a los barrios non solo democratiza l’usu, sinón que tamién fortalez el sentíu de pertenencia, la cohesión social y la participación ciudadana.

Sigimos avanzando con pasu firme, construyendo una candidatura que naz del territoriu y de la so xente.