L’equipu d’Uviéu 2031 xúntase colos comisarios culturales pa definir los próximos pasos

L’equipu de la candidatura d’Uviéu a Capital Europea de la Cultura 2031 caltuvo ayeri una xunta colos comisarios implicaos hasta agora, na que s’abordaron cuestiones claves pal desenvolvimientu del proyectu y se definieron los próximos pasos a dar.

Nel alcuentru, los comisarios presentaron les sos propuestes en cada disciplina y señalaron temes d’especial relevancia, como’l patrimoniu industrial y la tradición coral. Tamién se destacó la importancia d’impulsar proyectos interdisciplinarios y de reforzar les conexones con Europa. Amás, compartiéronse avances na revisión de los proyectos presentaos al traviés de la Manifestación d’Interés, a los que se contautará nes próximes selmanes.

Estes xuntes celébrense de manera periódica col oxetivu de siguir recoyendo idees, favorecer la collaboración ente disciplines y consolidar la participación de los comisarios como parte esencial de la candidatura.