Más de 10.000 persones visitaron el stand d’Uviéu 2031 na Feria de Muestres d’Asturies

Uviéu camina con pasu firme nel so enfotu por ser Capital Europea de la Cultura 2031. Na Feria Internacional de Muestres d’Asturies, el so stand —baxo l’eslógan «Puxa Europa, The Future is Now»— yá recibió a más de 10.000 visitantes.

La candidatura parte d’Uviéu, pero tien una visión que mira a tol país: nun ye namás un proyeutu de ciudá, sinón un retu de territoriu. L’espaciu combina información, esperiencies y participación. La bienllegada ta marcada por una referencia mui nuestra: el bancu icónicu de Mafalda, convertíu yá nun símbolu llocal.

Dientro, mapes, datos ya imáxenes amuesen les ciudaes que tuvieron el títulu dende 1985, acompañaes del patrimoniu, la escena artística, musical y la proyeición europea d’Uviéu.

La parte más viva vien coles actividaes: grabar un videu contando lo que te presta de la ciudá, rellenar una pequeña encuesta con idees pa meyorala o posar énte fondos como’l Teatru Campoamor o la plaza de la Catedral p’apoyar la candidatura y, de pasu, entrar nel sortéu d’entraes p’actos culturales.

El momentu clave llegará a finales d’añu, cuando Uviéu presente la so propuesta énte la Comisión Europea, compitiendo con ciudaes como Granada, Burgos, Toledo, La Palma o Jerez.

Con más de 10.000 persones yá implicaes, Uviéu sigue convidando a la ciudadanía a formar parte d’esti oxetivu común: convertinos nun referente cultural européu en 2031. Un retu que se constrúi día tres día, con idees, participación… y munches ganes.