Pensar los derechos culturales dende’l territoriu: diálogu en LABoral con Jazmín Beirak
¿Cómo garantizar que los derechos culturales lleguen a tolos rincones d’Asturies? Esa foi la cuestión central de Pensar los derechos culturales dende’l territoriu, l’alcuentru celebráu ayeri en LABoral Centru d’Arte y Creación Industrial con Jazmín Beirak, directora xeneral de Derechos Culturales del Ministeriu de Cultura.
La sesión, presentada por Semíramis González, directora del centru, contó cola participación de la conseyera de Cultura del Principáu d’Asturies, Vanessa Gutiérrez, y xuntó a axentes culturales ya instituciones asturianes. La charla zarróse con un ampliu turnu de entrugues y respuestes nel que s’abordó cómo aplicar esti enfoque nel contestu llocal.
Beirak presentó’l Plan de Derechos Culturales, una fueya de ruta con horizonti 2030 y 146 midíes empobinaes a garantizar l’accesu, la participación y la contribución de la ciudadanía a la vida cultural. Un plantegamientu que pon a les persones nel centru de les polítiques públiques y entiende la cultura como un derechu y una construcción colectiva. Nes palabres de Beirak, «la cultura tien de ser un derechu y la ciudadanía, el so principal destinatariu».
Nel diálogu destacóse la importancia del reconocimientu de la diversidá llingüística, incluyida la llingua asturiana, asina como la necesidá d’eliminar les barreres sociales y territoriales que dificulten la participación cultural, especialmente nel ámbitu rural.
L’alcuentru tamién punxo de relieve’l papel de la cultura como ferramienta de cohesión social y desarrollu territorial, en llinia colos valores que inspiren la candidatura d’Uviéu a Capital Europea de la Cultura 2031, basada na participación, la inclusión y la proyección del territoriu.
