CIMCO (Ciclu Interdisciplinar de Música de Cámara d’Uviéu) naz en 2021 con un oxetivu claro: averar la música de cámara a nuevos públicos nuna ciudá melómana per naturaleza como ye Uviéu. El ciclu apuesta por romper barreres, especialmente col públicu mozu o con quien entá nun tuvo un contautu direutu cola música académica, ufriendo un formatu íntimu, accesible y llenu de propuestes fresques.

CIMCO celébrase nel Auditoriu Príncipe Felipe, ún de los grandes espacios culturales de la ciudá, un edificiu modernu que rehabilitó los antiguos depósitos d’agua d’Uviéu, anguaño integraos na so arquitectura interior. Esta cercanía ente artistes y públicu convierte a CIMCO nuna esperiencia única, que xune calidá, proximidá y nueves maneres de vivir la música.