La programación cinematográfica d’Uviéu tien en SACO – Selmana del Audiovisual Contemporaneu d’Uviéu la so principal cita añal. Con más de diez ediciones, SACO convirtió’l cine nun puntu d’alcuentru con otres disciplines como la música, el teatru, la pintura, la lliteratura, l’arte dixital, les webseries, los videoxuegos o la realidá virtual y aumentada. La so vocación europea refléxase na presencia constante d’artistes y cineastes de países como Francia, Portugal o Reinu Xuníu.

SACO celébrase en distintos espacios repartíos pela ciudá, munchos d’ellos edificios emblemáticos como’l Museu de Belles Artes, el Museu Arqueolóxicu o l’Edificiu Históricu de la Universidá d’Uviéu, fomentando asina’l diálogu ente cine, patrimoniu y sostenibilidá. Una de les sos seiciones más significatives ta dirixida al públicu infantil y xuvenil, con una cuidada selección de curtios pa edaes ente 3 y 18 años, en collaboración con festivales y entidaes franceses.

A lo llargo del añu, la programación amplíase con RADAR, un ciclu de cine contemporaneu y retrospectives de grandes nomes del cine mundial, que caltién venceyos con cinematografíes como la rumana, francesa, polaca o coreana. Proyéctase principalmente nel Teatru Filarmónica, pero tamién s’estiende a otros puntos del conceyu, acercando’l cine en versión orixinal y de baldre a tol tipu de públicu.

Nel branu, el cine sale a la cai con CINE A LA LLUZ DE LA LLUNA, una propuesta de cine al aire llibre que percuerre barrios y pueblos del conceyu con una programación pensada pa tolos públicos y tolos gustos. Una manera de disfrutar del cine baxo les estrelles, en comunidá y con accesu llibre.