Dende la so primer edición en 1988, la Selmana Negra de Xixón pasó de ser un pequeñu alcuentru lliterariu dedicáu a la novela policial a convertise nún de los festivales culturales más populares y singulares d’Europa. Güei, durante la primer quincena de xunetu, xunta cada añu a más d’un millón de visitantes a lo llargo de 11 xornaes intenses plenes de lliteratura, música, pensamientu críticu y cultura pa tolos públicos.

Nacida con espíritu rebelde y creativu, la Selmana Negra supo mesturar con aciertu la presencia de grandes nomes de la lliteratura —policial, pero tamién fantástica, histórica, de ciencia ficción y poesía— con conciertos, charres, esposiciones y un ambiente únicu que tresforma Xixón nuna ciudá abierta al arte y la palabra.

A lo llargo de la so historia, pasaron pel festival figures como Willie Colón, Los Lobos, Mano Negra, Georges Moustaki, Ángel González, Juan Gelman, Luis García Montero o Joaquín Sabina, ente munchos otros. Un cruce de caminos onde la narrativa convive cola música, la poesía escuéyase baxo les estrelles y el pensamientu compártese ensin priesa.

En reconocencia a la so trayeutoria y valor cultural, el festival recibió distinciones importantes como la Medaya d’Oru al Méritu nes Belles Artes (2022) y la Medaya d’Oru de la Villa de Xixón (2023).

La Selmana Negra nun ye solo un festival: ye una esperiencia colectiva, un homenaxe a la palabra y una fiesta onde la cultura se vive na cai.