Cada branu, el patiu del Edificiu Históricu de la Universidá d’Uviéu conviértese nel escenariu de Tiempos Nuevos, un ciclu que xunta a artistes llocales, nacionales ya internacionales pa amosar qué ye —y a qué suena— la música popular contemporánea. Una música que naz nes periferies, nos márxenes, nes intersecciones. La que se crea dende los bordes, pero avanza un pasu por delantre.

Tiempos Nuevos apuesta por propuestes valientes, arriscaes y con identidá propia. Hai rock, folk, música urbana, esperimental o d’autor, pero siempres dende una mirada inqueda y actual. Son bandes colos pies nel presente y la cabeza nel futuru. La música de mañana, güei.

El ciclu toma’l so nome de les primeres pallabres del míticu discu que Ilegales espublizó en 1982, como un guiñu a esi espíritu llibre, provocador y fondamente creativu que representaba entós la banda asturiana. Esa mesma actitú ye la que comparten les más de 80 formaciones que pasaron por esti escenariu nos caberos años: Derby Motoreta’s Burrito Cachimba, Toundra, Ed Maverick, Los Estanques, Califato ¾, VVV [Trippin’ You], Sr. Chinarro, Rojuu, Tarta Relena, Los Punsetes, Albany, Nuria Graham, Futuro Terror o Elio Toffana, ente munches otres.