San Mateo 2025 ufiertará más de cien actuaciones pa tolos públicos

El stand d’Oviedo na Feria Internacional de Muestras d’Asturies (FIDMA), dedicáu esti añu a la candidatura a Capital Europea de la Cultura 2031, acoyó la presentación del programa de les Fiestes de San Mateo 2025. La conceyala de Festexos, Covadonga Díaz, tivo acompañada por Jorge Martínez, líder d’Ilegales, ún de los grupos que van actuar nesti San Mateo.

Les fiestes van celebrase del 11 al 22 de setiembre, con un entamu adelantáu’l 6 de setiembre gracies al Fyin Fest, que va cuntar con artistes como Camilo y María Becerra. El programa inclúi más de 100 actuaciones musicales nes cais y places, con grandes conciertos de Sebastián Yatra, Juan Magán, Omar Montes, Izal, Duncan Dhu, Coque Malla, Europe, Orquesta Tekila y el festival femenín Corazonadas Fest.

Amás de la música, San Mateo va ufiertar actividaes infantiles, folclor asturianu, deporte, mercáu na Avenida d’Alemaña, actos del Real Oviedo y el tradicional Día d’América, que va enllenar la ciudá de color y diversidá cultural. Como remate final, la romería del Cristo va zarrar el 28 de setiembre un mes de celebración.

Jorge Martínez adelantó que’l conciertu d’Ilegales, el 14 de setiembre, va ser “un percorríu pol nuestru repertoriu cola fuercia del rock and roll” y con precios populares pa tolos públicos.