Uviéu 2031 presenta al Conseyu de Capitalidá los avances del Bid Book y del relatu de la candidatura
L’equipu de la candidatura Uviéu Capital Europea de la Cultura 2031 aconceyó ayeri nel Palaciu d’Esposiciones y Congresos Calatrava col Conseyu de Capitalidá pa presentar los avances na ellaboración del Bid Book y del relatu del proyeutu.
El direutor de la candidatura, Rodolfo Sánchez, esplicó que nos caberos meses trabayóse en dos exes complementaries: la redaición del Plan Estratéxicu de Cultura d’Uviéu 2025–2035 (PECO) por Kreanta y el desarrollu del proyeutu que se va entregar el próximu 26 d’avientu de 2025. El PECO va aprobalu’l Conseyu Rector de la Fundación Municipal de Cultura y dempués va afitalu’l Plenu del Conceyu.
El coordinador xeneral, Pepe Mompeán, destacó la importancia de reforzar el texíu cultural llocal, impulsar la creación y producción artística y promover una vida cultural participativa, accesible ya inclusiva. Tamién sorrayó la necesidá d’integrar la cultura como motor de desarrollu caltenible y d’afitar el patrimoniu cultural y el paisaxe como exes estratéxiques pal futuru de la ciudá.
La coordinadora territorial, Zoe López Mediero, señaló que la ellaboración del dosier ta siendo un retu coleutivu y recordó que la participación ye un derechu cultural fundamental, tanto na so dimensión europea como na llocal. Amás, insistió na importancia de que la ciudadanía faga de so’l proyeutu pa garantizar l’impautu a llargu plazu.
Per videollamada intervieno Antonia Blau, direutora del Goethe-Institut en Madrid y responsable de la Dimensión Europea de la candidatura. Destacó qu’esta perspeutiva ye un elementu tresversal del proyeutu y señaló la necesidá de reforzar los venceyos con otres capitalidaes culturales.
El comisariu de Polítiques Culturales Públiques, Jorge Fernández León, punxo en valor el consensu algamáu y el trabayu conxuntu de toles árees.
El miembru del Conseyu de Capitalidá, Chus Neira, espunxo les llinies xenerales del relatu que va acompañar al Bid Book, y recordó que’l so conteníu completu va facese públicu tres del zarru del procesu competitivu’l día 26 d’avientu.
La direutora artística, Natalia Álvarez Simó, presentó les tres llinies del programa artísticu, orientaes a proyeutar una identidá cultural contemporánea, coneutada con Europa y fondamente arraigonada nel territoriu.
La sesión contó cola asistencia de representantes del ámbitu cultural, social y académicu, xunto con miembros del Conseyu de Capitalidá como Carlos López-Otín, Pilar Rubiera, Otilia Requejo, Semíramis González, Lucía García y Celestino Varela, que valoraron mui positivamente la propuesta y espresaron el so sofitu unánime al proyeutu.
