Uviéu avanza na so candidatura a Capital Europea de la Cultura cola so participación na conferencia Culture Next nos Países Baxos
La direutora artística de la candidatura, Natalia Álvarez Simó, asistió como observadora a la 14ª Conferencia de la rede Culture Next, celebrada ente’l 8 y el 10 de xunetu en Leeuwarden (Países Baxos). Trátase d’un foru européu centráu na participación cultural, con especial atención a la mocedá.
La conferencia xuntó a representantes de más de 50 ciudaes europees, delegaciones xuveniles de 18 a 27 años, artistes llocales y organizaciones culturales. L’axenda incluyó conferencies, talleres, sesiones collaboratives y espacios de contautu profesional col oxetivu común de compartir esperiencies, xenerar aliances nueves y diseñar estratexes conxuntes que fomenten la participación activa de la mocedá na vida cultural de les ciudaes.
Uviéu compartió espacios de trabayu con otres ciudaes candidates, dalgunes que yá tuvieron el títulu y otres que, ensin algamalu, siguen desendolcando una programación cultural sólida. Esta collaboración internacional ye fundamental pa nutrir la candidatura uvieína, xenerar sinerxes y afitar una visión cultural europea compartida.
L’alcuentru celebróse en paralelu col programa Arcadia, heriede de Leeuwarden como Capital Europea de la Cultura 2018, qu’a lo llargo de 100 díes tresforma la ciudá y la so rodiada nun escenariu vivu de propuestes artístiques. Esti contestu fixo más ricu’l desendolcu de les xornaes, xenerando conexones ente la teoría, la práutica y la esperiencia vivida.
La rede Culture Next, organizadora de la conferencia, ye una plataforma informal, inclusiva y collaborativa que xune a más de 40 ciudaes europees comprometíes col papel de la cultura como motor de desarrollu urbanu, cohesión social y anovamientu democráticu. Promueve’l sofitu mutuu ente ciudaes candidates y un diálogu cultural abiertu y duraderu sobre los retos contemporáneos.
La presencia d’Uviéu nesti foru reafirma’l so compromisu con una candidatura sólida, europea y abierta al futuru, basada na collaboración, la participación ciudadana, la memoria coleutiva y una mirada compartida escontra’l porvenir.
