Uviéu presenta’l cartelu del 8M col sofitu de la candidatura a Capital Europea de la Cultura 2031

Uviéu yá presentó’l cartelu y la programación pal 8 de marzu, Día Internacional de les Muyeres, nuna edición que se va desenvolver ente los meses d’abril y xunu con más de 50 actividaes dirixíes a tola población, con especial atención a la infancia y la mocedá.

La imaxe d’esti añu, baxo’l llema “Igualdá y respetu”, lleva la firma d’una creadora con un universu visual fácilmente reconocible pol usu del color y la fuerza espresiva de les sos figures femenines. El so trabayu pon el focu nes hestories personales, la identidá y la memoria, y conecta de manera natural colos valores del 8M: sensibilizar, narrar y celebrar la fuerza y la diversidá de les muyeres.

El programa, que podrá consultase na web municipal, inclúi presentaciones de llibros, talleres lúdicos, actividaes deportives, alcuentros col voluntariáu, la celebración del Muyeres Fest, la realización d’un mural collaborativu y propuestes impulsaes dende distintes árees municipales. Más de mediu centenar d’iniciatives diseñaes pa implicar a la ciudadanía dende múltiples ámbitos y llinguaxes, porque la igualdá constrúyese tamién dende la cultura, l’esporte, la educación y la participación.

El próximu 4 de marzu va celebrase l’actu institucional, nel que se va rendir homenaxe a cuatro muyeres que, pola so trayeutoria y compromisu, son exemplu d’esfuerciu y profesionalidá:

• Purita de la Riva, concertista, docente y defensora del patrimoniu musical rexonal.
• Carmen Benedet, pionera del galerismu n’España.
• Consuelo Vallina, figura influyente del arte contemporaneu n’Asturies.
• Elisee Florentino, artista visual y creadora emerxente.

Un reconocimientu a trayeutories diverses que ponen en valor el talentu y l’aportación de les muyeres nel ámbitu cultural y artísticu, y que recuerden que la igualdá nun ye solo una reivindicación, sinón un compromisu compartíu y cotidianu. Porque’l 8M ye una invitación a siguir avanzando, con respetu, memoria y compromisu.