Ventanielles celebró’l I Festival Mozu de la mano de la Asociación Luar
La Asociación Luar, entidá ensin ánimu d’arriquecimientu del barriu ovetense de Ventanielles, celebró esti fin de selmana’l I Festival Mozu, “Suañando Mocedá”, una cita gratuita protagonizada pola mocedá que enllenó de música y bona enerxía les cais del barriu en plenes fiestes de San Mateo.
Fundada en 2015, Luar trabaya pa menguar la desigualdá d’oportunidaes que afecta a mozos y moces de 16 a 35 años en situación d’esclusión social. Cada añu acompaña a unes 600 persones mozas en vulnerabilidá y, amás, ta impulsando anguaño la creación d’un teatru de barriu, un nuevu espaciu comunitariu pal arte y la cultura.
El festival “Suañando Mocedá” presentóse como un metaproyectu d’artes escéniques y plástiques que reunió a más de 30 artistes emerxentes d’Asturies en diferentes disciplines y formatos. El so oxetivu: ufiertar un espaciu d’ociu seguru, saludable y de baldre pa la mocedá d’Uviéu y pa toles persones que visitaron la ciudá nestes feches festives.
El programa, diseñáu de manera participativa pola propia mocedá del barriu, incluyó actividaes como un karaoke popular, un freetour per Ventanielles guíau polos mozos de la asociación, muralismu colectivu, conciertos, sesiones de DJ o un torneu de freestyle, ente otres propuestes que fixeron d’esti fin de selmana un tiempu de creatividá y alcuentru.
La esencia del festival nun ta namás nel que se pudo disfrutar, sinón tamién en cómo se xestó: dende la collaboración, la pertenencia y la participación. Esta iniciativa refuerza la importancia, dientro de la candidatura d’Uviéu a Capital Europea de la Cultura, de crear alianzes con proyeutos que representen la fuercia creativa con impactu social de la ciudá, dando reconocimientu y visibilidá a les propuestes que mejoren y enriquezan la vida de los neños, neñes y mozos que participan nelles.
El I Festival Mozu conviértese asina n’un primer pasu pa consolidar a Ventanielles como un referente de cultura comunitaria y mocedá n’Uviéu, au la cultura s’entien como ferramienta de tresformación y empoderamientu social.
