Uviéu intégrase nel nuevu grupu de trabayu de la FEMP pa les candidatures a Capital Europea de la Cultura 2031
La candidatura d’Uviéu forma parte dende güei del grupu de trabayu impulsáu pola Federación Española de Conceyos y Provinces (FEMP), col fin de reforzar la visibilidá y el reconocimientu de les ciudaes que opten a ser Capital Europea de la Cultura en 2031. Uviéu tuvo representáu na xunta por Rodolfo Sánchez, direutor de la candidatura, que viaxó a Madrid pa asistir al alcuentru.
La sesión, celebrada na sede de la FEMP y presidida pola so presidenta, María José García-Pelayo, alcaldesa de Jerez de la Frontera, reunió a representantes de les doce ciudaes que yá anunciaron la so candidatura: Burgos, Cáceres, Granada, Jerez de la Frontera, Les Palmes de Gran Canaria, Llión, Uviéu, Palma, Potríes (Valencia) y Toledo, amás d’otras dos candidatures yá presentaes de manera formal. El plazu pa presentar nueves propuestes permanece abiertu hasta’l 28 d’avientu.
García-Pelayo señaló que l’oxetivu d’esti grupu de trabayu ye garantizar que l’esfuerciu fechu poles ciudaes candidates —les infraestructures culturales reforzaes, les actividaes desendolcaes y los recursos movilizaos— tenga un respaldu institucional claru. Nesti sen, la FEMP solicitará al Ministeriu de Cultura la creación del títulu “Capital Española de la Cultura”, que funcionaría como reconocimientu complementariu al programa europeu. Amás, va treslladar al Ministeriu d’Hisenda la petición de declarar la Capitalidá Europea de la Cultura 2031 como “eventu escepcional d’interés públicu”.
Uviéu valoró mui positivamente la puesta en marcha d’esti espaciu de coordinación, que va permitir compartir avances, esplorar sinerxíes y fortalecer l’enfoque estatal del proyectu. Mentanto, la ciudá continúa avanzando na redacción del llibru de la so candidatura, col oxetivu de presentar una propuesta sólida, participativa y representativa de tol País Asturianu.
