Uviéu fai públicu’l videu col qu’abrió la so presentación delantre del xuráu de Capital Europea de la Cultura 2031
La candidatura uvieína tornó ayeri a Uviéu tres de presentar el so proyeutu delantre del xuráu en Madrid. Güei Toledo foi la última ciudá n’esponer la so candidatura, zarrando asina’l turnu de presentaciones. Agora namái queda esperar el veredictu, que va dase a conocer mañana.
Pel momentu, dende la candidatura compartióse’l videu col qu’entamó ayeri la presentación del proyeutu énte’l xuráu en RRSS. Una pieza audiovisual que funcionó como carta de presentación del territoriu. El videu abrió la intervención del equipu del Principáu d’Asturies, marcando’l tonu de la esposición y allugando al xuráu nel contestu cultural, social y territorial que sostenta la candidatura. Al traviés de semeyes del patrimoniu, natura, creación contemporánea y vida cultural, la pieza propón una mirada sobre Asturies.
Nun ye casualidá qu’esta mesma pieza se convirtiera agora nel videu d’apertura de la web oficial de la candidatura. Va ser, de dalguna manera, la puerta d’entrada dixital al proyeutu: una forma de dar la bienllegada a los que quieran descubrir qué propón Uviéu pa Europa nel 2031.
Nel puntu en que toles ciudaes presentaron los sos proyeutos, namái queda esperar la decisión del xuráu. Mientres llega esi momentu, esti videu resume en pocos minutos la esencia d’una candidatura que se construyó dende’l propiu territoriu, la collaboración y la cultura como motor de tresformación. Agora pues ver el videu col qu’Uviéu entamó la so presentación en Madrid.
