Uviéu 2031 impulsa Puxa el Barrio, un programa que lleva la creación artística a los centros sociales

El conceyu d’Uviéu punxo en marcha Puxa el Barrio. Arte que habita, un programa que va tresformar los centros sociales municipales n’espacios activos de creación, mediación y participación cultural. La iniciativa enmárcase na candidatura d’Uviéu Capital Europea de la Cultura 2031 y refuerza’l so compromisu con una cultura cercana, inclusiva y coneutada cola vida cotidiana de los barrios.

El proyeutu desendolca una de les llinies del Plan Estratéxicu de Cultura d’Uviéu (PECO 2035) al traviés de la puesta en marcha de residencies artístiques en distintos centros sociales del conceyu. Esta aición respuende a una estratexa empobinada a garantizar los derechos culturales y a promover una vida cultural descentralizada, participativa y accesible, na que la cultura actúe tamién como ferramienta pa facer frente a retos como la participación democrática, la convivencia o la reducción de les desigualdaes.

Puxa el Barrio naz como un programa paragües que va acoyer residencies artístiques repartíes per barrios urbanos y rurales, averando los procesos de creación contemporánea a espacios de proximidá. Artistes de disciplines como la danza, el teatru, la música, la fotografía, el diseñu o les nueves teunoloxíes van desenvolver proyeutos en collaboración direuta con vecinos y vecines, col oxetivu de convertir los centros sociales n’espacios vivos onde la cultura non solo se consuma, sinón que se construya de manera coleutiva.

Les propuestes van desenvolvese al traviés de procesos de mediación artística que faciliten l’alcuentru ente creadores y comunidá, xenerando formes nueves de rellación ente la ciudadanía y la cultura. Nos próximos meses, los barrios van empezar a acoyer residencies, talleres abiertos y procesos de creación compartida que van permitir a la población implicase na vida cultural del so entornu.

El primer proyeutu, Huellas, va entamar en mayu nos centros sociales de Buenavista y La Corredoria con una propuesta centrada na fotografía y la memoria. Al traviés d’esti procesu, les persones participantes van trabayar con imáxenes d’archivu y relatos personales pa esplorar el so entornu dende nueves miraes, ensin necesidá d’esperiencia previa. La iniciativa propón un averamientu creativu a la memoria coleutiva del barriu, combinando trabayu individual y dinámiques grupales que conviden a compartir vivencies, espectatives y formes d’habitar el territoriu.

Con esta iniciativa, Uviéu busca activar una rede d’espacios onde l’arte forme parte de la vida cotidiana, fortalecer el texíu cultural y asociativu y abrir nueves oportunidaes pa la cultura de base y de proximidá. El programa tamién contribuye a la profesionalización del sector creativu y refuerza’l papel de los centros sociales como motores d’anovamientu social y cultural. Puxa el Barrio plantégase, amás, como un proyeutu con vocación de continuidá, alliniáu cola visión de la candidatura d’Uviéu 2031: una cultura compartida, construyida coleutivamente y cola ciudadanía nel centru.