L’equipu d’Uviéu 2031 axuntó ayeri al sector cultural en Trescorrales pa compartir avances y próximos pasos de la candidatura

L’Edificiu de Trescorrales acoyó esti xueves un alcuentru abiertu cola ciudadanía nel que l’equipu de la candidatura d’Uviéu a Capital Europea de la Cultura 2031 compartió l’estáu del proyeutu y los pasos a siguir tres de superar la primer fase del procesu.

Mientres l’alcuentru, concebíu como un espaciu d’escucha, anuncióse la puesta en marcha d’una nueva llinia d’ayudes dotada con 200.000 euros, destinada a reforzar el texíu cultural y creativu llocal. La convocatoria, qu’abrirá’l próximu 1 de xunetu, tien como oxetivu sofitar iniciatives culturales a lo llargo d’esti añu y fortalecer l’ecosistema artísticu.

L’alcuentru sirvió tamién pa treslladar a les persones asistentes les principales conclusiones del panel d’espertos europeos, que valoraron positivamente l’enfoque del proyeutu, especialmente’l conceutu de “amabilidá” como exa vertebradora. Tamién se señalaron ámbitos de meyora rellacionaos cola participación ciudadana y l’impulsu del voluntariáu, aspeutos nos que l’equipu yá ta trabayando de cara a la siguiente fase.

Rodolfo Sánchez, direutor de la candidatura, sorrayó’l potencial tresformador del procesu, destacando que ser Capital Europea de la Cultura nun implica namás desarrollar una programación cultural, sinón tamién repensar la ciudá dende una perspeutiva más abierta, coneutada y europea.

Les codireutores artístiques, Paula Mota y Zoe López, compartieron escenariu per primer vegada dende’l so nomamientu pa tratar los retos d’esta nueva etapa. Ente ellos, avanzar na construcción d’un proyeutu con una dimensión europea real, capaz de xenerar conexones internacionales y d’implicar activamente a la ciudadanía. Amás, quixeron reconocer el trabayu del equipu de comisariáu, destacando’l so papel clave mientres la primer fase y la so implicación nos retos actuales de la candidatura.

L’alcuentru contó tamién cola participación de Habla la Tinta, un equipu de poetes que volvió les sos máquines d’escribir una ferramienta de creación en direuto. A partir de conversaciones coles persones asistentes, creaben poemes nel momentu, aportando una dimensión participativa al actu.

Marta Fernández Silverio foi la encargada de presentar l’actu y contextualizar el momentu actual de la candidatura, qu’entra agora nuna fase decisiva cola ellaboración d’un nuevu dossier que va presentase al xuráu nos próximos meses. Un documentu que deberá reflexar non solo l’aspiración cultural del territoriu, sinón tamién la so capacidá pa xenerar un impautu duraderu.

L’alcuentru contó cola participación d’axentes culturales, artistes, representantes institucionales y ciudadanía, nuna xornada que terminó cola actuación musical de Tania Pereira, que punxo’l ramu final a la nueche.