Uviéu celebra la diversidá xuvenil col Festival Sin Llendes como altavoz d’una cultura inclusiva
El Conseyu de la Mocedá d’Uviéu acoyó’l Festival Sin Llendes, un alcuentru alredor de la diversidá, la inclusión y la participación xuvenil na cultura, que sirvió amás como escenariu pa la presentación de les nueves codirectores artístiques de la candidatura d’Uviéu a Capital Europea de la Cultura 2031, Paula García Mota y Zoe López Mediero.
Dambes presentaron esta nueva etapa del proyectu, qu’incorpora una dirección artística compartida encargada de definir y desenvolver la programación cultural nesta fase de la candidatura. Mientres la so intervención, espusieron les principales llinies de trabayu nes que yá tán trabayando, con especial atención a la accesibilidá, la participación de la mocedá y un modelu cultural más abiertu ya inclusivu.
“Estamos trabayando nun proyectu del que vosotros y vosotres formáis parte, centrado en facer la cultura accesible y fomentar la participación activa de la xente moza”, señaló Zoe López, que destacó tamién la importancia de sacar al alumnáu de les aulas pa vivir la cultura de manera directa al traviés d’iniciatives como esti festival, onde la diversidá ocupa un llugar central.
Nesti contestu, convidóse tamién al públicu a conocer más de cerca’l proyectu nel edificiu Trascorrales, onde’l próximu 16 d’abril a les 20:00 hores tendrá llugar un alcuentru y conciertu pa presentar el momentu actual de la candidatura y responder a les entrugues de la ciudadanía. Mientres l’actu recordóse que tanto Uviéu como Asturies tienen tolo necesario pa aspirar al títulu européu, destacando la importancia de reforzar l’autoestima cultural y fomentar la participación ciudadana.
Pela so parte, Paula García Mota esplicó que’l procesu atópase nun momentu decisivu dientro d’una competición europea que conocerá los sos resultaos a finales d’añu, señalando que ye una etapa clave de trabayu intensu na que se va siguir recoyendo la voz de la ciudadanía y abriendo espacios de diálogu.
Tres esta presentación, el Festival Sin Llendes desenvolvió una programación a lo llargo de tol día que convirtió la ciudá nun puntu d’alcuentru pa distintes propuestes artístiques. Pela mañana celebróse una actuación del grupu de teatru La Orquesta, siguida de Colectivo Diverso y de les sesiones musicales de Trezze y Sergio DJ. Pela tarde proyectóse la película Sorda, completando una xornada que reivindica una cultura ensin barreres y abierta a toles persones.
