Uviéu presenta Europenses, un nuevu espaciu européu de pensamientu contemporaneu
La candidatura d’Uviéu a Capital Europea de la Cultura 2031 presenta un nuevu programa que convida a parar, pensar y conversar dende la cultura. Col nome Europenses, la iniciativa preséntase nel marcu del Día d’Europa como unu de los proyeutos estratéxicos recoyíos nel so bidbook, col oxetivu de xenerar un espaciu de reflexón sobre los grandes temes qu’altraviesen güei l’axenda europea, en diálogu cola realidá asturiana.
Nun contestu marcáu pola aceleración, la descortesía y la creciente polarización del alderique públicu, Europenses propón un cambéu de ritmu. Frente a la inmediatez y el ruíu, plantea abrir espacios pa la conversación pausada, reivindicando la cultura como una ferramienta esencial p’abordar cuestiones qu’afeuten direutamente a la democracia, la convivencia y el futuru común.
El programa naz con vocación de continuidá, como una de les mandes culturales de la candidatura. Al traviés de distintes ediciones, con comisariáu convidáu y en diferentes sedes del Principáu, dirá tratando cuestiones clave de l’axenda europea en conexón col territoriu.
Esta primer edición articúlase alredor de l’Amabilidá, conceutu central de la propuesta cultural d’Uviéu 2031. Lloñe d’entendese como una actitú superficial, plantégase como una ferramienta crítica pa repensar cómo habitamos el mundu y cómo nos rellacionamos colos demás nun presente altraviesáu pol conflictu y la fraxilidá de los venceyos.
Les sesiones van celebrase los díes 7 y 8 de mayu a les 19h nel Muséu de Belles Artes d’Asturies, con comisariáu de Giselle Etcheverry Walker. La primer xornada, El tiempu de los groseros, axuntará a la filósofa Renata Salecl y al sociólogu César Rendueles, nuna conversación moderada pol periodista Sergio C. Fanjul. Al día siguiente, “El oficio de habitar” va contar cola participación de la filósofa Corine Pelluchon, la pensadora Marta Tafalla y el músicu y investigador Xosé Ambás, cola moderación d’Helena Torres.
Amás, coincidiendo cola so estancia na ciudá, Renata Salecl y Corine Pelluchon van participar en firmes de llibros na Feria del Llibru d’Uviéu, onde van presentar les sos obres más recién, Maleducaos y La democracia ensin sometimientu, reforzando la conexón ente’l programa y l’ecosistema cultural de la ciudá.
El nome Europenses recupera una de les primeres referencies documentaes del términu europeos, recoyida nuna crónica del sieglu VIII. Una manera de mirar al pasáu pa repensar el presente y reivindicar Europa como una construcción cultural compartida, basada en valores como la convivencia, el respetu y la cooperación.
Con Europenses, Uviéu sigue avanzando nel so camín a 2031, reforzando la so apuesta pola cultura como espaciu de pensamientu, diálogu y construcción coleutiva.
