Uviéu impulsa una gran Marcha pola Amabilidá d’al rodiu 2.500 escolinos y escolines
Más de 30 centros educativos, artistes, families y centros sociales van participar esti vienres nuna gran aición ciudadana venceyada al Día d’Europa y a la candidatura d’Uviéu a Capital Europea de la Cultura 2031.
Uviéu va celebrar esti vienres 8 de mayu la Marcha pola Amabilidá, una de les grandes aiciones participatives impulsaes pola candidatura d’Uviéu a Capital Europea de la Cultura 2031. La iniciativa va axuntar al rodiu de 2.500 neños y neñes de 32 centros educativos de la ciudá nuna movilización creativa que va enllenar les cais de música, color ya imaxinación.
L’Amabilidá ye ún de los conceutos centrales de la candidatura, entendíu como una forma d’afalar la convivencia, el respetu, el cuidáu y la cooperación al traviés de la cultura. “Más de 30 escueles d’Uviéu van participar na marcha. Los neños y neñes tuvieron trabayando con 25 artistes y preparando tolos elementos pa defender el relatu de l’Amabilidá como respuesta a los problemes qu’esisten nel mundu”, esplica Rodolfo Sánchez, direutor de la candidatura.
L’actividá supón amás la primer aición de les residencies artístiques n’escueles recoyíes nel Plan Estratéxicu de Cultura d’Uviéu, PECO 2035. Mientres selmanes, l’alumnáu trabayó xunto a artistes de disciplines como danza, música, teatru, circu, artes plástiques o reciclaxe pa crear pancartes, canciones, vestuariu, instrumentos y pequeñes aiciones coleutives que van formar parte del percorríu.
“Les escueles son mui importantes pa la candidatura. Na marcha va haber estudiantes, profesoráu, artistes y families, toes xuntes nesti camín”, señala Paula García Mota, codireutora artística d’Uviéu 2031. Pela so parte, Zoe López Mediero destaca que “esti ye un camín qu’empieza agora y nel que vamos implicar a tola comunidá educativa pa construyir xuntos esti proyeutu de candidatura”.
La xornada va entamar na Plaza de la Catedral y va rematar na antigua Fábrica d’Armes de La Vega, que se va tresformar simbólicamente nuna Fábrica d’Amabilidá: un espaciu pa la imaxinación, el xuegu y la creación compartida.
Ellí van desarrollase distintes propuestes artístiques y participatives con teatru, circu, música, maxa, instalaciones y xuegos coleutivos, de mano de compañíes y artistes como Higiénico Papel, Mar Rojo Teatro, Hipnótica Circo Teatro, Adrián Conde o la compañía francesa Le Piano du Lac.
La Marcha pola Amabilidá marca amás l’entamu d’un procesu más ampliu de participación infantil y mozu dientro de la candidatura d’Uviéu 2031, con aiciones nueves previstes nos centros educativos mientres el próximu cursu.
