Sentémonos: l’equipu d’Uviéu 2031 sal a la cai pa conversar cola ciudadanía sobre la candidatura

La candidatura d’Uviéu a Capital Europea de la Cultura 2031 estrenó esti sábadu na plaza del Conceyu Sentémonos, una iniciativa abierta a la ciudadanía pa esplicar el proyectu, resolver duldes y recoyer aportaciones de manera directa.

Baxo’l lema “Ensin priesa, ensin inscripción”, la propuesta convida a vecinos, vecines y visitantes a sentase y conversar col equipu d’Uviéu 2031 nun formatu cercanu, ensin escenariu, atril nin discursos. La primera sesión convirtió la plaza del Conceyu nun espaciu d’alcuentru, pensáu p’averar la candidatura a la vida cotidiana de la ciudá y facilitar que cualquier persona pueda conocer meyor el proyectu.

Durante la mañana, l’equipu d’Uviéu 2031 compartió información sobre qué significa ser Capital Europea de la Cultura, en qué momentu s’atopa la candidatura o qué papel puede tener la ciudadanía nesta nueva fase. La iniciativa busca abrir una canal d’escucha directa, recoyer impresiones y sumar miraes al proyectu dende una conversación tranquila y accesible.

Sentémonos forma parte del procesu de participación ciudadana de la candidatura y va continuar nes próximes selmanes en distintos puntos d’Uviéu. La ciudá trabaya anguaño na preparación del segundu dosier que va presentar ante’l xuráu européu, depués de ser escoyida como una de les cuatro finalistes xunto a Cáceres, Granada y Las Palmas de Gran Canaria.

Con esta iniciativa, Uviéu 2031 refuerza la so voluntá de construyir una candidatura compartida, cercana y conectada con quienes viven, visiten y faen ciudá cada día.