Oviedo 2031 pieslla les sos meses de participación con cerca d’un centenar de participantes y más de 50 propuestes
Oviedo 2031 pieslló esta selmana les sos meses de participación con cuatro sesiones celebraes ente los díes 6 y 9 de xunetu. Los alcuentros abordaron ámbitos clave como la educación, l’accesibilidá, los cuidaos, la diversidá, la non discriminación, el territoriu y la comunidá. Cerca d’un centenar de persones participaron nesti procesu d’escucha, ente profesionales, axentes sociales, entidaes espertes, asociaciones, instituciones, colectivos y informantes clave venceyaos a caún de los ámbitos de trabayu.
Durante les sesiones recoyéronse cientos d’idees que van tenese en cuenta na ellaboración del segundu dosier de candidatura, amás de más de 50 propuestes de proyectos y acciones. Toles aportaciones van ayudar a siguir construyendo una candidatura inclusiva, participativa y atenta a la diversidá social y cultural d’Uviéu y Asturies.
El procesu permitió incorporar voces, esperiencies y necesidaes reales venceyaes a la participación na vida cultural. Les persones participantes compartieron conocimientos, detectaron barreres, plantegaron oportunidaes y propunxeron nueves formes d’averar la cultura a distintos públicos, territorios y comunidaes. La candidatura quier destacar la enorme xenerosidá y implicación de toles persones que formaron parte de les meses, según la ilusión colectiva que despierta Oviedo 2031 como una oportunidá pa tresformar la ciudá al traviés de la cultura.
Les sesiones reforzaron tamién el papel de la Amabilidá, conceutu central de la candidatura, como una forma de trabayar basada na escucha, los cuidaos, la convivencia y la participación real. Esta manera d’entender el procesu busca que la candidatura x genere espacios onde les persones puedan dialogar, reconocese y construyir xuntes.
Les meses cuntaron amás con un importante componente de mediación artística, qu’ayudó a activar les conversaciones, facilitar la participación y xenerar nueves formes de devolver y compartir lo trabayao.
Les ilustradores residentes n’Asturies Isabel Muñoz, Kamendi, Kiyary Domínguez y Verónica Grech realizaron la relatoría gráfica de les cuatro sesiones. Les sos ilustraciones recueyen les principales idees, reflexones y propuestes surdíes durante los alcuentros y conformen una memoria visual del procesu.
Tamién participó la cooperativa asturiana Territorio Emocional, especializada en mediación, competencies socioemocionales y facilitación de grupos. Al traviés del cuerpu y les artes escéniques, la so intervención ayudó a crear un clima de trabayu cercanu y participativu y a devolver de manera creativa dalgunes de les idees compartíes durante les sesiones.
Les conclusiones d’esti procesu van incorporase al trabayu de la candidatura y van contribuyir a siguir definiendo’l proyectu d’Oviedo 2031 xunto al texíu social y cultural d’Uviéu y Asturies.
