Uviéu 2031 presenta’l so Conseyu Institucional, formáu por más d’un centenar d’empreses y entidaes

La candidatura d’Uviéu a Capital Europea de la Cultura 2031 presentó’l so Conseyu Institucional, integráu por más d’un centenar d’empreses, asociaciones y entidaes comprometíes col proyeutu. L’órganu entamó la so andadura en 2025 con alredor de 40 integrantes y amplió dende entós de manera notable la representación del texíu empresarial ya institucional asturianu.

El director d’Uviéu 2031, Rodolfo Sánchez, destacó qu’esti crecimientu reflexa’l sofitu de la sociedá asturiana a una candidatura d’ámbitu rexonal. “Queremos siguir sumando empreses y entidaes pa que’l Conseyu Institucional seya’l reflexu del sofitu y del compromisu de toa Asturies col proyeutu”, señaló.

Les nueves incorporaciones fueron xestionaes pol responsable de Relaciones Institucionales y Patrocinios, Javier Sáenz de Jubera. La candidatura atópase agora nuna nueva fase centrada na captación de patrocinios y yá cuenta con cerca d’una decena d’empreses comprometíes.

Dempués del branu van siguir les presentaciones nes cámares de comerciu, na Federación Asturiana d’Empresarios y n’otros organismos venceyaos al texíu empresarial. Uviéu 2031 va aprovechar tamién la so presencia na Feria Internacional de Muestres d’Asturies pa caltener nuevos alcuentros y reforzar l’espardimientu del proyeutu.

Sáenz de Jubera valoró de manera mui positiva la respuesta de les empreses y aseguró que l’oxetivu ye siguir ampliando la participación nos próximos meses.

L’alcalde d’Uviéu, Alfredo Canteli, sorrayó la importancia del sofitu institucional, empresarial y social a la candidatura y destacó’l trabayu del equipu d’Uviéu 2031. “Toi seguru de que vamos consiguílo porque hai magníficos profesionales trabayando y contamos con un enorme sofitu en toa Asturies”, afirmó.

La Capitalidá va ser amás el filu conductor del estand del Conceyu d’Uviéu na Feria de Muestres, onde la cultura va ocupar un llugar protagonista dientro de la programación.