Oviedo 2031 axunta a docentes y colectivos culturales na so primera mesa de participación dedicada a educación y cultura
La Escuela d’Arte d’Uviéu acoyó esti llunes la primera de les cuatro meses de participación entamaes pola candidatura d’Uviéu a Capital Europea de la Cultura en 2031. La sesión, centrada n’educación y cultura, axuntó a docentes, representantes de centros educativos, mediadores culturales y colectivos artísticos de distintos puntos d’Asturies.
Esta mesa forma parte del procesu d’escucha y participación impulsáu por Oviedo 2031 pa incorporar nueves aportaciones al segundu dosier de candidatura. A lo llargo de la xornada, les persones participantes trabayaron alredor de los retos, criterios y oportunidaes que pueden ayudar a construyir una propuesta más inclusiva y conectada cola realidá educativa, cultural y social d’Asturies.
La mesa axuntó perfiles venceyaos a centros de Primaria y Secundaria, proyectos de mediación cultural, creación artística y participación ciudadana. Ente les entidaes participantes tuvieron iniciatives como Arte en Red, colectivu impulsor de la Muestra de Arte Contemporáneo Escolar d’Asturies, y Cuéntame un Cuadro, proyectu dedicáu a averar l’arte y la cultura a públicos diversos.
A lo llargo de la sesión abordóse la importancia de reforzar la presencia de la educación artística na candidatura, facilitar la circulación de proyectos culturales pel territoriu y sofitar iniciatives que yá esisten n’Asturies y que pueden contribuyir al espíritu d’Oviedo 2031.
La xornada permitió recoyer aportaciones sobre’l papel de la cultura como ferramienta de cohesión social, aprendizaxe compartíu y tresformación. Les persones participantes coincidieron na necesidá de construyir una candidatura abierta y plural, capaz d’escuchar a quienes trabayen cada día dende les aules, los barrios, les asociaciones y los espacios de mediación cultural.
Esta primera mesa abre un ciclu de cuatro alcuentros. Les próximes sesiones van tar dedicaes a accesibilidá y cuidaos, diversidá y non discriminación, y territoriu y comunidá.
Con estes meses de participación, Oviedo 2031 sigue avanzando na construcción d’una candidatura compartida, enraigonada n’Asturies y pensada pa sumar voces, esperiencies y proyectos nel camín hacia la Capital Europea de la Cultura.
