El Conseyu de Capitalidá d’Uviéu 2031 axúntase colos sos nuevos miembros pa reforzar el dossier final de la candidatura

El Conseyu de Capitalidá d’Uviéu 2031 celebró esti xueves una sesión de trabayu nel Auditoriu Príncipe Felipe, la primera tres la incorporación de los sos nuevos miembros. L’alcuentru axuntó a representantes del ámbitu cultural, social, educativu, institucional y ciudadanu nun momentu decisivu pa la candidatura d’Uviéu a Capital Europea de la Cultura en 2031.

“El Conseyu ta ayudándonos a desenvolver una bona parte de los proyectos artísticos, pero’l so papel verdaderu, y el del texíu cultural, va entamar de verdá cuando consigamos el títulu”, aseguró Rodolfo Sánchez, director de la candidatura.

La xunta sirvió tamién pa facer balance del trabayu que permitió a Uviéu superar la primera fase del procesu de selección y asitiase ente les cuatro ciudaes finalistes, xunto a Granada, Cáceres y Las Palmas de Gran Canaria. La candidatura céntrase agora na preparación del segundu dossier, que tendrá que presentase ante’l xuráu européu’l próximu 3 de payares.

Durante la sesión, Sánchez espunxo l’estáu actual del proyectu, acompañáu poles codirectores artístiques Zoe López y Paula Mota. Los nuevos miembros del Conseyu pudieron tamién treslladar les sos aportaciones y prioridaes pa enriquecer esta nueva etapa.

Ente los principales exes destacaos nel alcuentru figuraron la proyección de La Vega como gran fábrica cultural abierta a toa Asturies, la unidá cultural, social ya institucional alredor de la candidatura y el papel de la cultura comunitaria como ferramienta d’integración, participación y convivencia.

La xunta sorrayó tamién la importancia de garantizar l’accesibilidá universal y de siguir construyendo una candidatura que nun dexe a naide fuera. Uviéu 2031 afronta asina la fase final del procesu con un Conseyu de Capitalidá ampliáu y una propuesta artística sólida, europea y conectada cola realidá cultural y social d’Uviéu y Asturies.