La candidatura d’Uviéu convoca un alcuentru col texíu cultural y artísticu asturianu en LABoral Centru d’Arte

La candidatura d’Uviéu a Capital Europea de la Cultura 2031 va celebrar el próximu 22 de mayu un alcuentru abiertu empobináu específicamente al texíu cultural y artísticu asturianu. La sesión va facese a les 18:30 hores en LABoral Centru d’Arte y Creaición Industrial y va xuntar artistes, xestores culturales, comisarios, programadores, galeristes, coleutivos y axentes culturales de tol país.

L’alcuentru va plantegase como un espaciu de trabayu, escucha y construcción coleutiva nun momentu decisivu pa la candidatura, qu’encara agora la segunda fase del procesu européu. El próximu 3 de payares de 2026 va ser la fecha llende pa la entrega del segundu dossier de candidatura, un documentu que va ampliar les propuestes culturales, estratéxiques y de dimensión europea que van formar parte d’Uviéu 2031.

Mientres la xornada, la direición artística colexada de la candidatura, formada por Paula Mota García y Zoe López Mediero, va compartir les claves d’esta nueva etapa, los retos y recomendaciones plantegaos pola Comisión Europea tres la fase de preseleición y les llinies de trabayu que van marcar el desenvolvimientu del segundu dossier.

Mientres la sesión, va abrise un espaciu ampliu de preguntes y conversación coles persones asistentes. Una de les exes del alcuentru va ser precisamente reflexonar sobre’l papel del sector cultural asturianu dientro d’una candidatura que quier construyise dende la implicación activa del territoriu y dende la conexón ente Asturies y el contestu européu.

La Capital Europea de la Cultura trabaya con un horizonte a llargu plazu y busca xenerar procesos que seyan a tresformar l’ecosistema cultural, fortalecer redes y activar nueves oportunidaes p’artistes, espacios y axentes culturales.

La xornada va rematar compartiendo una cerveza y con una sesión musical de María Mieres.