Oviedo 2031 impulsa HUELLAS, un proyectu de fotografía collaborativa y memoria de barriu
La candidatura d’Oviedo a Capital Europea de la Cultura 2031 pon en marcha Huellas, un llaboratoriu creativu de fotografía collaborativa y memoria colectiva que forma parte de Puxa el Barrio, el programa impulsáu pa llevar procesos de creación artística y participación cultural a los centros sociales municipales.
La iniciativa desendólcase de manera simultánea nos centros sociales de Buenavista y La Corredoria y propón utilizar la fotografía como ferramienta d’espresión personal, creación artística y reconstrucción de les histories cotidianes que conformen la identidá de los barrios uvieínos.
Huellas ta desendolcáu poles fotógrafes y mediadores artístiques Irma Collin y Ainhoa Valle, profesionales especializaes en fotografía participativa y procesos de creación comunitaria venceyaos a la memoria colectiva y la mediación cultural.
A lo llargo de distintes sesiones, les persones participantes van trabayar na recuperación, analís y resignificación de semeyes familiares y archivos personales venceyaos a los sos barrios. Al traviés de dinámques creatives y collaboratives, el proyectu busca averar la cultura y la creación contemporánea a espacios de proximidá, xenerando llugares d’alcuentru, intercambiu y participación comunitaria.
“La idea ye treslladar a les persones participantes que la cultura nun asocede namás nos museos, sinón que ta presente na vida cotidiana y ye una ferramienta que ayuda a fortalecer los venceyos comunitarios”, esplica Pepe Mompeán, coordinador xeneral d’Oviedo 2031.
Huellas forma parte de Puxa el Barrio, un programa col que la candidatura busca convertir los centros sociales en espacios vivos de creación, mediación y convivencia cultural. La propuesta pon el focu nel papel de la cultura como ferramienta de cohesión social, participación ciudadana y construcción colectiva dende los barrios.
“El proyectu desendólcase alredor de trés exes: memoria, fotografía y barriu. La idea de fondu ye entender que la dimensión cultural ye tresversal y asocede tamién nos barrios y nos centros sociales, teniendo una dimensión interxeneracional mui importante. Tamos recopilando recuerdos, álbumes y archivos personales de la xente del barriu pa poner el focu nes pequeñes histories cotidianes que, al final, son les que terminen contando una gran historia”, señala Zoe López Mediero, codirectora artística de la candidatura.
Ente los oxetivos de Huellas tán la recuperación de la memoria visual d’Uviéu, l’impulsu del diálogu interxeneracional, la creación de narratives inclusives y diverses y el fortalecimientu de la cohesión social al traviés de la cultura.
Amás de les sesiones presenciales, el programa va continuar en setiembre col desarrollu y producción d’una esposición final que va recoyer parte del trabayu realizáu mientres el procesu creativu.
