Love is in the Air: un proyeutu pa respirar, movese y crear coleutivamente dende Trubia
La candidatura d’Uviéu a Capital Europea de la Cultura 2031 sigue llevando la creación contemporánea a los barrios y espacios de proximidá con Love is in the Air (L’amor ta nel aire), un nuevu procesu creativu comunitariu que se va desenvolver en Trubia y el so entornu nos próximos meses.
Guiáu pola bailarina y coreógrafa Mónica García, el proyectu propón esplorar el movimientu, la respiración y el venceyu coleutivu como ferramientes de creación, convivencia y conexión col territoriu. La iniciativa forma parte de Puxa el Barrio. Arte que habita, el programa de mediación artística impulsáu pola candidatura pa activar los centros sociales y averar los procesos de creación contemporánea a la ciudadanía.
La propuesta ta dirixida a persones residentes en Trubia y alredores, ensin llímite d’edá y ensin necesidá d’esperiencia previa en danza o artes escéniques. “Esti ye un procesu interxeneracional. Tol mundu ta convidáu a participar. Nel nuesu camín ye mui importante’l trabayu de participación comunitaria pa poder construyir xuntes un procesu conectáu coles práctiques artístiques contemporánees”, esplica Paula Mota Garcia, codirectora artística de la candidatura d’Uviéu a Capital Europea de la Cultura 2031.
El procesu creativu va desenvolvese en dos bloques de trabayu: el primeru nel mes de xunu y un segundu en setiembre y ochobre. Al traviés del cuerpu, el movimientu y la escucha coleutiva, la iniciativa busca xenerar espacios d’alcuentru, cohesión comunitaria y creación compartida alredor del territoriu y les relaciones humanes.
El proyectu tamién quier poner el focu en espacios culturales del territoriu como’l Teatru de Trubia. “Amás de la creación y el trabayu coleutivu, esta iniciativa convida a redescubrir llugares que son auténtiques xoyes y que resulten especialmente inspiradores pa les práctiques artístiques contemporánees”, señala Zoe López Mediero, codirectora artística de la candidatura.
Como puntu de partida, el próximu miércoles 3 de xunu va celebrase una charra informativa y una sesión abierta con Mónica García, de 18:00 a 19:30 hores. L’alcuentru va sirvir pa presentar el proyectu y abrir un primer espaciu de participación con vecinos y vecines interesaes en formar parte de la iniciativa.
“Queremos poner a Trubia a bailar. La danza contemporánea ye munches vegaes una gran desconocida y tengo la necesidá d’averame a ella dende otru puntu de vista. Love is in the Air ye una propuesta pa movese, respirar y compartir”, esplica Mónica García.
Con iniciatives como esta, Uviéu 2031 sigue desarrollando una estratexa cultural de proximidá que entiende la creación artística como una ferramienta de participación, convivencia y tresformación social.
